Yeni tədqiqatlar göstərir ki, dünyanın ən böyük ağciyəri və ən geniş bioloji müxtəliflik sahəsi olan Amazon tropik meşələri geri dönülməz bir quraqlığa doğru irəliləyir. Tədqiqatçılar xəbərdarlıq edir ki, Amazon yaxın gələcəkdə yamyaşıl tropik meşələrini daha quru savannaya çevirəcək kritik bir dönüş nöqtəsinə sürətlə yaxınlaşır.

Medialoq.az türk mediasına istinadən xəbər verir ki, bu böyük dəyişiklik, iqlim dəyişikliyi və meşəsizləşmənin birləşməsi nəticəsində ola bilər. Amazonlar, 6 milyon kvadrat kilometr ərazisi ilə dünyadakı ən böyük tropik yağış meşəsidir və dünyadakı bitki və heyvan növlərinin təxminən 10%-ni əhatə edir. Dünya Təbii Mühafizə Fonduna görə, Amazon 99 milyard tondan 154 milyard tona qədər karbon ehtiva edir və hər il orta hesabla 180 sm yağış alır. Bu səbəbdən, qlobal su və karbon dövranını tənzimləyən vacib bir komponentdir.

Keçən əsrdə Amazon kimi yağış meşələri, iqlim dəyişikliyi və meşəsizləşmənin yaratdığı quraqlıq və meşə yanğınları səbəbindən getdikcə daha kövrək vəziyyətə gəldi. Dünya Resursları İnstitutunun Qlobal Meşə İcmalına görə, yalnız 2024-cü ildə Braziliya Amazonu 28 min kvadrat kilometr meşəsini itirə bilər.

Geofizik Tədqiqat Məktubları jurnalında yayımlanan araşdırmaya görə, bəzi alimlər bu dəyişikliklərin Amazonları yamyaşıl yağış meşələrindən quru çəmənliklərə çevirəcək kritik bir həddə gətirdiyini düşünür.

Cambridge Universitetinin Dünya Sistemləri Elmləri professoru və araşdırmanın müəllifi Andrew Friend bildirib ki, “belə bir dəyişikliyin mümkün olduğuna dair məntiqi əsaslar var”. Friend Live Science-a açıqlamasında əlavə edib: “Sual budur: iqlim dəyişikliyi və meşəsizləşmənin hansı dərəcəsi bu sistemin dönüşməsinə səbəb olacaq?”

Medialoq.az / Səkinə Yusifova