Prezident İlham Əliyevin Şamaxıya səfərinin çox böyük mənəvi, psixoloji əhəmiyyəti var.

Bu sözləri Axar.az-a Prezident İlham Əliyevin zəlzələnin baş verdiyi Şamaxıya səfərini və zəlzələnin fəsadlarının aradan qaldırılması üçün verdiyi sərəncamı şərh edən millət vəkili Musa Quliyev deyib. O bildirib ki, zəlzələnin fəsadları qısa müddət ərzində Prezidentin sərəncamına əsasən aradan qaldırılacaq:

“Prezident İlham Əliyevin zəlzələnin vətəndaşlarımıza vurduğu zərərin aradan qaldırılması üçün verdiyi göstəriş və tapşırıqlar onu göstərir ki, o, düzgün qərar qəbul edən böyük liderlərdəndir. Prezidentin tapşırığına əsasən, zəlzələ bölgəsində yaşayan vətəndaşlara yardım göstərilir. Ötən gün Fövqəladə Hallar naziri Kəmaləddin Heydərov və dövlət rəsmiləri də orada sakinlərlə görüşdülər. Vəziyyət yerində qiymətləndirildi və lazımi addımlar atıldı. Prezidentin Şamaxıya getməsi, sakinlərlə görüşməsi həmin bölgənin sakinləri və bütövlükdə Azərbaycan cəmiyyəti üçün əhəmiyyətli hadisədir. Hər bir vətəndaş hiss edir ki, onun yanında Azərbaycan dövləti və dövlət başçısı durur. Şübhəsiz ki, Prezident orada o insanlar üçün də lazımi tapşırıqlarını verib. Zəlzələdən zərər çəkən bütün sakinlər üçün hər cür şərait yaradılacaq və onların bütün tələbləri ödəniləcək. Hesab edirəm ki, zəlzələnin fəsadlarının aradan qaldırılması müvafiq dövlət qurumları tərəfindən qısa müddət ərzində həyata keçiriləcək. Necə ki, bundan öncəki dövrdə də Balakən-Zaqatala bölgəsində zəlzələ olmuşdu və Kür çayının daşması ilə əlaqədar bəzi evlərə ziyan dəymişdi. Həmin vaxt da Prezident lazımi addımların atılması üçün fərmanlar vermişdi. Qısa müddət ərzində həmin sakinlərin şəraitləri tamamilə yaxşılaşdırıldı və əvvəlkindən də yaxşı mənzillər tikildi. Eləcə də İsmayıllı və Şamaxıda da qısa müddət ərzində zəlzələdən zərər çəkən insanların bütün tələbatları ödəniləcək”.

Millət vəkili bildirib ki, bu, Azərbaycanın gücünü göstərməklə yanaşı, dövlət başçısının öz vətəndaşına sevgi və qayğısının ifadəsidir:

“Həmçinin sakinlərin də prezidentə diqqəti və qayğısı üçün təşəkkür etməsi onu göstərdi ki, bütün vətəndaşlarımız öz prezidentinin yanındadır”.

Qeyd edək ki, Prezident ötən gün 5-6 fevralda baş verən zəlzələdən zərər çəkmiş evlərə baxış keçirmək üçün Şamaxıya gedib, sakinlərlə görüşüb və yerindəcə tapşırıq və göstərişlərini verib.