Usaq tez-tez iltihabi xəstəliklərə tutularsa, adenoidlərin ölçüləri böyüyür, onlar iltihablaşır - irinləşir və adenoidit əmələ gəlir. İltihablaşmış adenoidlər daimi infeksiya mənbəyinə çevrilərək uşaqlarda daha tez-tez hallarda KRVİ, anginalar, otitlər (orta qulağın iltihabı), bronxlar və ağ ciyər xəstəliklərinin baş verməsinə səbəb olur.

Adenoidit zamanı adenoidlərdəki iltihabı aradan götürmək üçün uşağın burnuna xüsusi antiseptik məhlullar damcılanır (bu zaman uşaq arxası üstə uzadılmış və başı da arxaya əyilmiş olmalıdır). Adenoiditin müalicə və profilaktikası üçün buruna "tuya” ağacının yağını damcılatmaq da yaxşı effekt verir.

Əgər adenoiditin müalicəsi effekt vermirsə, böyümüş və iltihablaşmış adenoidləri cərrahi yolla xaric edirlər. Belə əməliyyatları uşaqlarda, adətən, 3 yaşından sonra aparırlar. Təəssüf ki, əməliyyatdan sonra "xəstə” toxumanın ən kiçik hissəsi belə, yerində qalmış olarsa, bu toxumadan yenidən adenoidlər inkişaf edir. Bu səbəbdən belə əməliyyatları yalnız bu əməliyyatların aparılmasında böyük təcrübəyə malik olan çox savadlı uşaq cərrahlarına etibar etmək lazımdır. Hal-hazırda adenoidləri daha tez-tez hallarda endoskopik yolla xaric edirlər (kiçik kameranın köməkliyi ilə həkim bütün prosesi dəqiqliklə monitorda izləyir). Belə əməliyyatlar zamanı adenoidlər millimetr dəqiqliyi ilə tam şəkildə xaric edilir. Bu zaman xəstə toxuma qalması və yenidən əmələgəlmə ehtimalı heçə enir.