Son vaxtlar uşaqlar arasında öskürək, qusma, yüksək temepratur və ishal əlamətləri ilə müşahidə edilən xəstəlik yayılıb.

İstər paytaxt, istərsə də regionlarda valideynlər uşaqlarında müşahidə etdikləri bu əlamətlərin hansı səbəbdən qaynaqlandığını bilmirlər. Bu əlamətlərin səbəbi qədər hansı müalicə üsullarından istifadə etməli olduqları valideynləri narahat edir. Xüsusən, tədris ilinin başlanması səbəbindən xəstəliyin əlamətlərinin uşaqlar arasında daha sürətlə yayılacağına şübhə yaratmır.

Bir neçə gün əvvəl Bakının Xəzər rayonun Binə qəsəbəsində 2015-ci il təvəllüdlü Nuray İbrahimova pnevmoniyadan dünyasını dəyişib. Bu xəbər isə valideynlərin narahatlığını bir az da artırdı.

Baş pediatr Nəsib Quliyev bildirib ki, hazırda uşaqlar arasında epidemiya təhlükəsi yoxdur: "Hazırda uşaqlar arasında öskürək, ishal və qusma kəskin respirator virus xəstəliklərinin əlamətləridir. Bu əlamətlərin müşahidə olunduğu xəstələrin sayında xüsusi artım yoxdur, ancaq belə hallara rast gəlirik. Çünki havalar dəyişib və bu aylarda uşaqların məktəblərə, bağçalara toplaşıb. Bu zaman uşaqlar bir-biri ilə təmasda olur. Bir uşaqda xəstəlik əlamətləri varsa, digərlərini də yoluxdura bilir. Mövsümi olaraq, kolelktivlərin cəmləşməsi ilə əlaqədar olaraq kəskin respirator virus xəstəliklərində artım müşahidə edilir. Lakin bu kütləvi bir hal almayıb. Hazırda uşaqların xəstələnmə faizi ötən illərdən fərqlənmir”.

Baş pediatr valideynlərə xəbərdarlıq edərək bildirib ki, hava şəraitinin dəyişməsi ilə əlaqədar olaraq uşaqlara bir az da artıq diqqət ayırsınlar: "Xüsusən də, geyimlər mövsümə uyğun seçilməlidir. Xəstəlik əlamətləri müşahidə edilirsə, tibb işçiləri ilə əlaqə saxlayıb, uşağı məktəbə, bağçaya buraxmasınlar. Çünki bu zaman sağlam uşaqlar da yoluxa bilir”.

Uşaqlarında kəskin respirator virus xəstəlikləri əlamətləri müşahidə olunan valideynlərə sahə həkimləri tərəfindən antibiotiklər məsləhət görülür. Valideynlər isə çox zaman bu antibiotiklərin effektini görmədiyindən istifadə etmir. Bəzi hallarda türkəçarə üsullarına əl atırlar.

Baş pediatr isə hər iki məqama qarşı olduğunu deyir: "Uşaqlarında xəstəlik əlamətlərini müşahidə edənlər yaşadığı ərazidə sahə pediatrına müraciət etsin. Həkim uşağı görən kimi ona antibiotik yazırsa, o həkimi dəyişmək lazımdır. Çünki virusla xəstələnən uşağa antibiotik yazılmaz. Bir ailədə 3 uşaq varsa və onlar hamısı xəstələnibsə, demək xəstəliyin törədicisi virusdur. Əgər həmin xəstəyə virus yazsam, həkim kimi səhvə yol vermiş oluram. Valideyn əvvəlcə sahə həkimini dinləsin. Onun məsləhət gördüyü dərmanlar ağlına batmazsa, həkimdən göndəriş atıb,daha yüksək ixtisaslı dövlət xəstəxanasında müayinədən keçsin. Lakin təəssüf ki, valideynlər həkimə müraciət etməkdənsə, özlərinin müalicə üsullarını tətbiq edirlər. Həkimin yüzündən biri problem yaradırsa, 99%-i valideyn yaradır".

Pnevmoniyadan ölüm halına gəldikdə, N.Quliyev bunu istisna etmədiyini dedi: "Bu, qeyri-adi hal deyil. Pnevmaniya çox ağır xəstəlik hesab edilir, bu zaman ağ ciyərdə iltihablaşma yaranmış olur. Qrip, pnevmaniyadan ölüm ola bilər. Uşaqlar arasında ölüm hallarının səbəbləri sırasında pnevmaniya ilk yerlərdə durur. Xüsusən də, bir yaşa qədər uşaqlar arasında bu daha çoxdur. Bunun da səbəbi də erkən yaşlı uşaqlarda tənəffüs üzvlərinin çox da yaxşı inkişaf etməməsi ilə bağlıdır. Bu həm də vaxtında və düzgün müalicənin seçilməməsi ilə əlaqədar ola bilər. Çünki pnevmaniya bir neçə mərhələdə olur. Bəzən valideynlər gözləyir, uşaq nəfəs ala bilməyəndə həkimə müraciət edir. Həmçinin xəstəliyin gedişində ağırlaşmalar da ola bilir”.

Publika.az