11 ayın Sultanı Ramazan ayı inanclı insanlar üçün özəl bir aydır. Oruc tutmağın faydaları haqqında daha əvvəl yazmışdıq. İndi isə istədik ki, Ramazanda necə qidalanmaq, yəni sahurda və iftarda bizə zərər verməyəcək şəkildə qidalanma haqqında məlumat verək.

Sahurda necə qidalanaq:

Birincisi nəzərə almaq lazımdır ki, bu vaxtdakı oruc, yəni yay orucu həm müddəti uzun, həm də isti hava ilə müşayiət olunur. Buna görə də mütləq sahura durmaq lazımdır. Səhər, yəni imsakda qızardılmış, ədviyyatlı, duzlu yeməklərdən uzaq olmaq lazımdır. Kəpəkli çörək yeyilməlidir, çünki kəpəkli çörək ağ çörəkdən 4 dəfə gec sorulur. Bu uzun zaman ac qalmaq üçün faydalıdır. Ağ çörək 4 dəfə tez sorulduğundan qanda şəkərin miqdarı yeməkdən sonra çox qalxır və tez də düşür. Bundan başqa suda qaynadılmış yumurtaya üstünlük verilməlidir. Yumurtanın tərkibindəki zülal orqnizmin enerji balansını qoruyur. Suda qaynadılmış tikə ət də bu baxımdan faydalıdır. 3-4 ədəd xurma çox gözəl olar. Xurmada həm karbohidrat, həm zülal, həm də az miqdarda yağ vardır. Kəpəkli makaron, yerli düyü çox faydalıdır. Duzsuz pendir, qaymaq, smetan yemək faydalıdır. Süddə bişmiş yulaf və ya müsli yemək də faydalıdır. Bol-bol su içilməlidir. Köp olmamaq üçün razyana ilə çobanyastığı qarışıqlı çay içmək məsləhətdir. Susuzluğun qarşısını almaq üçün limonlu çay və ya məkkəgülü dəmlənmiş çay içmək məsləhətdir. 1 xörək qaşığı məkkəgülü çiçəklərini 3 stəkan suya tökün, üzərinə 2 ədəd çubuq darçın, 2 ədəd alma və 2 xörək qaşığı bal və şəkər tozu əlavə edin. Qarışığı zəif odun üzərində 5 dəq qaynadın, sonra soyuducuya qoyun və səhər imsaqda için. Bu içki həm dadlıdır, həm də susuzluğun qarşısını almaq üçün əla vasitədir.

İftarda nə yeməli:

İftar 2 hissəyə bölünməlidir. Birdən-birə mədəni çox yükləmək olmaz. Çünki aclıq zamanı metabolizma (maddələr mübadiləsi) zəifləyir, bu zaman köp, sancılar və qəbizlik baş verə bilər. Yeməyə su ilə başlayın, sonra sulu yeməklərə üstünlük verin. Çalışın süfrənizdə mövsümi meyvələr bol olsun. Süfrədə qatıq, ayran, salat, göyərti də olsun. Mədəsində qıcqırma olanlar qatığı kefirlə əvəzləsin. Sulu yeməkdən sonra biraz istirahət edin, bu zaman idman hərəkətləri çox faydalıdır və həzmə kömək edir. Bundan sonra enerjili yeməklər yeyə bilərsiniz. Yenə də ağ çörək istifadə etməyin. Lifli yeməklərə, meyvələrə və quru meyvələrə üstünlük verin. Yeməkdən sonra köpün, qəbizliyin və sancıların qarşısını almaq üçün yaşıl çay, nanə, zəncəfil, adaçayı, məkkəgülü, darçın, hil, cirə, mixək kimi bitkiləri istərsəniz tək-tək, ya da hansını tapa bilsəniz bir birinə qarışdırıb çay dəmləyib içə bilərsiniz. Yaxşı qidalanmaq lazımdır, çünki sabah yenə oruc tutulmalıdır. Allah oruclarınızı qəbul etsin İnşallah.