Artıq xərçəngə də dözürük
17.05.2016, 14:30
2477
Hazırda ölkədəki onkoloji xəstələrin 14 577 nəfəri 5 və 5 ildən yuxarı müddətdə bu diaqnozla yaşayanlardır.
Bunu Azərbaycan Səhiyyə Nazirliyinin baş onkoloqu Azad Kərimli deyib.
Baş onkoloq bildirib ki, ölkədə onkoloji diaqnozla 5 il və daha çox yaşayanların sayı çoxalıb. 2014-cü idə 5 və 5 ildən yuxarı müddətdə onkoloji diaqnozla yaşayanların sayı 13 582, 2013-cü ildə isə 13 284 nəfər olub.
A.Kərimli əlavə edib ki, hazırda Azərbaycanda 40 653 onkoloji xəstə qeydiyyatdadır.
2015-cü ildə 10 183 nəfərə həyatında ilk dəfə onkoloji diaqnoz qoyulub. Onların 4541 nəfərində (2014-cü ildə 4256 nəfərdə) onkoloji xəstəlik xəstəliyin I və II mərhələsində aşkarlanıb.
Baş onkoloq qeyd edib ki, bütün dünyada olduğu kimi, Azərbaycanda ən çox təsadüf olunan onkoloji xəstəlik traxeya-bronx-ağciyər xərcəngidir. Bu xəstəliyə ən çox kişilərdə rast gəlinir.
Qadınlar arasında isə daha çox süd vəzisi və uşaqlıq boynu xərcəngi müşahidə olunur. Xərcəng xəstəliyinə əsasən yaşı 50-dən yuxarı olan insanlar arasında təsadüf olunur.
A.Kərimlinin sözlərinə görə, ölkədə onkoloji xəstələrin sayı artsa da, bu artım bir çox ölkələrlə müqayisədə Azərbaycanda xeyli aşağıdır.
Onkoloji xəstələrin sayının 9 milyon nəfərdən cox əhalisi olan Azərbaycan üçün o qədər də böyük rəqəm saymayan baş onkoloq deyib ki, əhali arasında bu xəstəliklərlə bağlı maarifləndirmə işləri aparılır: "Eyni zamanda, insanlar vaxtında müraciət etməyə başlayıblar. Xəstəliyin I və II mərhələsində də müraciət edənlərin sayında artım müşahidə edilir".
Trendi.Az
HƏKİMLƏR
TEZLİKLƏ...
