Nikaha daxil olmaq istəyən şəxslərin tibbi müayinədən keçmə qaydasına uyğun olaraq, ötən il iyunun 1-dən bu günə qədər nikaha daxil olmaq istəyən 107 min  500 insan tibbi müayinədən keçib.

Elmi-Tədqiqat Hematologiya və Transfuziologiya İnstitutunun məlumatında bildirilir ki, həmin şəxslərin 6228 nəfərinin talassemiya daşıyıcısı olduğu üzə çıxıb. Müayinə aparıldığı gündən indiyə qədər 48 cütlükdə, yəni həm oğlanda, həm də qızda talassemiya aşkarlanıb. Hətta xəstəlik aşkarlanandan sonra evlənməkdən imtina edənlər də olub.

Son səkkiz ayda 71 nəfərdə İİV infeksiyası, 328 nəfərdə isə sifilis olduğu müəyyən edilib. İİV infeksiyası ilə bağlı məlumatlar Respublika QİÇS-lə Mübarizə Mərkəzinə göndərilib. Çünki həmin şəxsləri təkrar müayinədən keçirməlidirlər.