Havaların soyuması qaza olan tələbatı artırıb. Məhz, bu səbəbdən isti aylarla müqayisədə dəm qazından boğulanların da sayında artım müşahidə edilir.

Maraqlıdır, bu şəxslər niyə vaxtında xilas yolu tapa bilmir?

Kliniki Tibbi Mərkəzin Toksikologiya şöbəsinin müdiri Azər Maqsudov Cebhe.info-ya açıqlamasında bu haqda danışıb:



“Şəxs vaxtında həmin mühitdən çıxa bilərsə, həyatını riskə salmır. Dəm qazının qoxusu yoxdur. Əsas əlaməti halsızlıqdır ki, bu da 5-10 saniyədə özünü göstərməyə başlayır. Bu səbəbdən tövsiyyə edirik ki, hamam otaqlarında nəfəslik açıq olsun. Bundan başqa həmin qaz cihazlarının da quraşdırılması zamanı diqqətli olmaq lazımdır. Bəzi nüanslara diqqət yetirilmədiyi üçün dəm qazından boğulmalar, ölüm halları olur. Bəzən cihaz yerinə uyğun olmadan quraşdırılır. Bu səbəbdən də oksigen çatmır, oksigen əvəzinə dəm qazı əmələ gəlir.

A.Maqsudovun sözlərinə görə, ötən illə müqayisədə bu il dəm qazı ilə bağlı daxil olan müraciətlərin sayında artım olsa da, xəstələrin qəbulunda azalma var:

“Xəstələrin qəbulunda, zəhərlənmələrin ağırlıq dərəcəsinə görə azalmalar var. Ötən il bu rəqəm 455 idisə, cari ildə bu rəqəm 207-dir. Son bir həftədə 18 müraciətdən 9-u qəbul olunub”.